عشان مصر

الي من أعلنوا مقاطعتهم للتصويت فى انتخابات الرئاسة "عزيزى المقاطع فكر تانى أرجوك، الشعب ده بقاله ستين سنة مقاطع.. يوم ما يبقى الشعب كله بيسألك هتنتخب مين ما يكونش ردك: لا دى انتخابات أونطة قاطعها، بالعكس، لازم تقول له: انتخب اللى أنت شايفه أقرب لتحقيق أهداف ومطالب الثورة اللى أنت آمنت بيها، ولو ما اتحققتش المطالب دى ثور عليه! ثور ثانى وثالث سواء كان هو اللى أنت انتخبته أو حد غيره، وسواء كنت قبلت بنتيجة الانتخابات أو لا قبل ما تكتشف الخداع، وسواء عدم تحقيق المطالب كان بالعافية أو بالحيلة، أنت رايح تنتخب المطالب والأهداف الثورية مش رايح تنتخب الفرعون، رايح تنتخب واحدة من أدوات حماية تقدم وانتصار الثورة مش رايح تنتخب المشهد الختامى فيها.

العبرة مش بنتيجة الانتخابات بل بنتيجة الضغط الثورى من أجل تغيير البلد جذريا للأفضل، وده مش هيحصل واحنا قاعدين على الشط بنكلم الناس على أصول فن السباحة ونسخر منهم على عومهم الكلابى فى قلب الدوامات! الحل الوحيد هو إننا ننط معاهم ونطبش سوا لحد ما نعوم كلنا... لأنه كده كده لو لا قدر الله انهزمت الثورة.. حنغرق كلنا.